वासिङ्टन डीसी, माघ १६
अमेरिकी राष्ट्रपति भवन ह्वाइट हाउसले स्वतन्त्र पत्रकार, पोडकास्टर, प्रभावशाली व्यक्ति (इन्फ्लुएन्सर) र कन्टेन्ट क्रिएटरलाई आधिकारिक रूपमा प्रेस ब्रिफिङमा सहभागी हुन अनुमति दिने भएको छ ।
ह्वाइट हाउसकी प्रेस सचिव क्यारोलिन लेभिटले नयाँ सञ्चार माध्यमका प्रतिनिधिहरूका लागि प्रेस पास आवेदन खुला गरिएको जानकारी दिँदै सो कुरा समेत बताउनु भयो । ‘यदि तपाईं दैनिक समाचार सामग्री निर्माण गर्नुहुन्छ र स्वतन्त्र पत्रकार हुनुहुन्छ भने ह्वाइट हाउस कभरेज गर्न स्वागत छ ।’ उहाँले भन्नुभयो ।
यसअन्तर्गत, परम्परागत रूपमा प्रेस स्टाफका लागि छुट्याइएका सिटहरू अब नयाँ मिडिया प्रतिनिधिहरूका लागि उपलब्ध गराइनेछ । साथै, पूर्व राष्ट्रपति बाइडेन प्रशासन अन्तर्गत रद्द गरिएका ४४० प्रेस पासहरू पनि पुनः बहाल गरिने घोषणा गरिएको छ ।
