अमेरिका, चैत ५
नेपाली गीतसंगीतमा लोक दोहोरीशैलीको एउटा सिर्जना थपिएको छ । जो मन छुने सृजनाका रुपमा तयार छ । भूटानबाट पुनर्वास भई अमेरिकामा बस्दै आउनु भएका नेपालीभाषी गीतकार हरि उप्रेतीको शब्दमा तयार ‘लौरी’ को म्यूजिक भिडियो सार्वजनिक भएको छ, जसले प्रेमी–प्रेमीकाबीचको आत्मीय सम्बन्ध र नेपाली लोकसंस्कृतिको सौन्दर्यलाई सुन्दर रूपमा उजागर गर्छ ।
सागर लामाको लोक आधुनिक संगीत र कृष्ण केसीको एरेञ्जमा ख्यातिप्राप्त गायक प्रमोद खरेलकासाथमा तृप्ति खड्का गुरुङको सुमधुर स्वर छ । विजय गुरुङको निर्देशनमा विजय गुरुङ र जुना विश्वकर्मालाई मोडेलका रुपमा गीतको भाकामा प्रस्तुत गरिएको छ । प्रकाश खड्का समूहको सिनेमेटोग्राफी रही नेपालका ग्रामिण बस्तीमा छायांकन भएको भिडियोलाई ड्र्यागन पिक्चर्सका मिलन विश्वकर्माले सम्पादन तथा नरेश पाण्डेले मिक्सिङ/मास्टरिङ गर्नुभएको छ । मिडिया प्रवद्र्धनमा पत्रकार अर्जुन प्रधान रहनु भएको छ ।
‘लौरी’ गीतले प्रेमी–प्रेमीकाबीचको स्नेह, चाहना र जीवनका उतार–चढावलाई लोकदोहोरी शैलीमा प्रस्तुत गर्छ । मिठासपूर्ण शब्द, गहकिलो संगीत र उत्कृष्ट स्वर संयोजनले गीतलाई अझ प्रभावशाली बनाएको छ । नेपाली लोकसंस्कृतिको मौलिकतालाई जोगाउँदै आधुनिक स्वाद दिन खोजिएको यो गीत सबै उमेर समूहका स्रोताहरूका लागि मनमोहक बन्ने गीतकार उप्रेतीको अपेक्षा छ ।
गीतकार उप्रेती नेपाली गीत संगीतको क्षेत्रमा परिचित नाम हो । आप्रवासी नेपाली सर्जकका रूपमा उहाँले डेढ दशकदेखि नेपाली गीत–संगीत, साहित्य तथा संस्कृतिको पाटोमा निरन्तर काम गर्दै आउनु भएको छ । उहाँ आप्रवासी नेपाली गीतकार संघ, अमेरिकाका अध्यक्ष समेत हुनुहुन्छ । लोकगीतको संरक्षण तथा प्रवद्र्धन गर्दै आउनुभएका उप्रेतीका सिर्जनाहरूले नेपाली लोकसंस्कृतिलाई आधुनिक शैलीसँग जोड्ने काम गर्दै आएका छन् ।
गीतकार उप्रेती भन्नुहुन्छ ‘लोकसंस्कृतिको संरक्षण गर्नु हाम्रो पहिचानको रक्षा गर्नु हो । ‘लौरी’ गीतले प्रेम मात्र नभई नेपाली लोकभाषा र संस्कृतिको सुगन्धसमेत बोकेको छ ।’ गीत सार्वजनिक भएसँगै श्रोताहरूबाट राम्रो प्रतिक्रिया आइरहेका छन् । गीतको म्युजिक भिडियोले पनि खोलानाला, पहाडसहितको ग्रामिण सांस्कृतिक सौन्दर्य उजागर गरेको छ ।
नेपाली लोकगीतहरू केवल मनोरञ्जनका माध्यम मात्र होइनन्, ती हाम्रो मौलिक पहिचानका संवाहक पनि हुन् । हरि उप्रेतीजस्ता समर्पित सर्जकहरूले लोकगीतलाई समयानुकूल बनाएर प्रवद्र्धन गर्न गरेको प्रयास सह्रानीय छ । ‘लौरी’ गीतले पनि नेपाली लोकदोहोरी संगीतमा विशेष स्थान बनाउने विश्वास गरिएको छ । गीत हरि उप्रेती अफिसियल युट्युब च्यानलमा उपलब्ध छ ।
